Genesis 4

Ken Hawe Abol

1Ano badeh Adam amadin hawe udun, eme ma ndrine udun i tinan. 2Eme ma iy atehei nah mwan; ano iy tiye, “Laban aseben jo ma nah mwan ndrasahan.” Eme iy tondrohani nyaran Ken. Ano badeh iy atehei mwan ari ja nyaran Abol. Eme badeh Abol badeh asahan ndramak ta atondrok iri katin haka, ma hawe Ken badeh asahan ndramak ta bilin.

 3Ano oro ado sese badeh, Ken eme badeh andrei nyamon rayah badu bilin eme iy asun i nyara salom i ta Laban. 4Ano Abol eme andrei nadu sipsip ari kasen mwasin handru, ano badeh iy idiy imek. Eme iy edeu i nyara salom mwasin. Eme ya Laban Kindrei badeh sekesek ma aseken Abol ma salom tan. 5Arile ta Ken badeh iy baseken handru bwe. Eme badeh Ken i bolosen handru ma ndrinen isi handru en.

 6Ano badeh Kindrei tiye i ta Ken, “Ou a bolosen ta sasah? Badam asaram ta sasah? 7I buku none ou amwekes lakou mwasin, i dah nane ou sekesek; arile ou ndramwesekei kandriyen ndra-in, eme karei ma lomondra ndra-in abe-en ou ma abwe-ek ou udu konam. Eme ou abadok doh?”

 8Ano badeh Ken tiye sahou i ta nadu tinen Abol, “Talu ka-au kala len.” Eme uru au ame len badeh, Ken eme tubuni iy, eme ma iy idi nadu tinen imek.

 9Ano Laban eme ndremenya Ken, “Nadu tinem ndraheh?” Eme iy anya, “Jo tanan bwe oh, jo atondrok iy ai?”

 10Ano Laban tiye, “I buku sah ou amwekes budon ndra-in dah? Ndraye nadu tinem asah eden udu bolo ndren kede-eh; eden eme tek ta ou kameh akohok isi saluwen. 11Eme ya i dah kameh munyak kameh andra-i na bales tasah na ou. Munyak badeh ndranyuwi ndraye nadu tinem i buku none ari lakou bohon asak le, na len ou adai iy. 12Ya i buku none ou anya atah baso kameh, munyak kameh winiyan bamwekes bateh bwe, ma ou kameh ta tekedek le.”

 13Eme Ken tiye i ta Laban i buku doh, “Ou tiye sahou badeh maha-an labai eme tek. 14Ou kameh tikahei jo iu ta munyak ma ta tondrok ai, ma jo kameh edek le ai, ya are ndrondron jo kameh idi le jo ai?” 15Arile Laban anya eh, “Bwe, i buku none are idi ou, i dah kameh lau ndro taloh amak i saluwem.” Eme Laban atehei kalem i ta Ken ta tiye tanan i tare ndrondron iy badeh sadai iy. 16Eme Ken iu, iu ta mada Laban ili udu munyak aloh, “Lolo-an Le,” udu loboho an eme loken ta bilin Iden.

Lundriye Ken

17Ano badeh Ken uru udun atehei nadu uru eme tondrohani nyaran Inok. Ano badeh Ken tahi kon tinan ari ma tondrohani nyaran i nyara nadun. 18Eme Inok atehei nadun ari tondrohani nyaran Irat, ya iy badeh tama Mahuja-el. Eme Mahuja-el atehei nadun mwan ari nyaran Matusa-el ya iy badeh tama Lemek. 19Lemek badeh sudi badih la-uh, Adah hawe Silah. 20Eme Adah badeh edeu Jabel eme iy badeh tubu iri lau ta amadin asiu balei, ma iri doh badeh lahou tiri ta atondrok iri katin haka. 21Ya nadu tinen Jubel badeh tubu iri lau ta oloh bala-eu ma ta adi ndran. 22Silah badeh edeu Tubal Ken; iy badeh tubu iri lau ta amwekes lakou ta lahou i buku samen na hayen nyikilikin. Ya nadu tinen badeh nyaran Namah.

 23Ano Lemek tiye i ta udun uru, “Adah ah Silah ah kanuhun jo! Jo badeh ndradai loweu ari ndramak, tasah iy anya ka-um jo. 24I buku none lau ndro taloh amak ta saluwe Ken imek, badeh kameh ndro tonoh ndro taloh (77) kameh amak i buku none iri kadai jo.”

Set Hawe Inos

25Ano Adam uru udun atehei nadu uru mwan ari ja. Eme udun tiye, “Kindrei badeh atehei nah mwan ari i saluwe Abol ala Ken mene idi iy.” Eme iy tondrohani nyaran badeh Set. 26Eme Set atehei nadun mwan ari tondrohani nyaran Inos. Eme kabatana doh badeh iri lau baraloh nyara Laban barala ta atudun ai.
Copyright information for LID